媽媽教我的詩 媽媽教我的詩
即日起至11/4(日)報名
客語
個人組

羽 102146

時間的重量—我讀渡台悲歌

時間个重量-𠊎讀渡臺悲歌

時間有幾多斤重? 仰般會將長喃喃个歷史
矺到扁扁薄薄 , 睡到恬靜个壅塵下背
𠊎細心細義,掀開四髀兩析个書皮
第一頁 唐山過烏水溝,六死三在一回頭
第二頁 羅漢腳尋無唐山婆,想起胞衣跡个老爺哀
第五頁 天黃黃地黃黃 屋下有個好噭郎
三朝七日無奶食 揹籃㧡䉂上山岡
第七頁 閻王詐鬼轉,有錢無理莫入來
三年官兩年滿,褲袋飽飽轉唐山
第九頁 擎錘擎棍 竹篙菜刀
相爭一座山 鬥打一片平陽
尖頭利角,將一疊歷史揰到血流血著
第十八頁 浩洪斗雨 三年燥荒
第三十六頁 蟲蛀
第九十九頁 缺角
第 ……

一直到時間流過,正知讀个係渡臺悲歌
輕輕合起臺灣移懇史,四百頁个命
落秤無風恁重,一聲道嘆長過河江

擎起彩筆,畫過青色書皮
再掀開無王無法無烏無白
第一頁 放入硬骨
第二頁 寫上體惜
第三頁 放入和挼
一頁一頁解開死結,將綿綿个歷史補轉
又種一頭花香,這應該係一本五彩未來
輕輕合起課本,日久他鄉即故鄉
白露秋分寒露霜降,冬至个娘花冷天送燒暖
𠊎上山取著硬骨老竻竹,愛做一支堅韌堅韌个老擔竿
愛㧡起老祖公三百年前長山過臺灣,㧡毋起个心酸。

目前 277