媽媽教我的詩 媽媽教我的詩
即日起至11/4(日)報名
客語
個人組

盧仲韜 Max Lu

阿姆个聲

阿姆个聲 軟軟
揞呀揞 拍呀拍
軟軟个聲就像會拐人樣仔
目珠跈等就眨下來
佢軟軟 涯甜甜

阿姆个聲 尖尖
雞寮肚正孵出來个雞子
半夜分人偷淨淨
大罵个尖聲嚇到狗仔緊吠
佢尖尖 涯聾聾

阿姆个聲 扁扁
阿爸半夜正轉屋
間房肚兩儕冤家
扁扁个聲在門縫項鑽出來
佢扁扁 涯恬恬


阿姆个聲 溂溂
姐婆過身
佢拉等涯跪到靈堂
溂溂个聲聽毋識唸个經文
佢溂溂 涯憨憨

阿姆个聲 彎彎
不管路行幾久 離家幾遠
耳公脣就係有佢會轉斡个聲
寒了愛著衫 錢毋罅愛講
彎彎个聲跈到若無結無煞

姆媽 姆媽
手機看得著阿姆皺皺个面容
同佢揚手 頭那緊點
喊佢幾下擺 全毋會應人
阿姆 軟軟 尖尖 扁扁 溂溂个聲
毋知囥去哪位
會轉斡个聲
乜走到無影無蹤

阿母个聲 無聲

目前 285